Monda ASEMBLEO Socia (MAS)  [<<<]
La ĉina ambasadoro WU Ken en intervjuo kun la gazeto WirtschaftsWoche 2021-02-27
de WirtschaftsWoche  
28a februaro 2021

La ĉina ambasadoro WU Ken en intervjuo kun la gazeto WirtschaftsWoche 2021-02-27

WirtschaftsWoche : Sinjoro ambasadoro, la tuta Eŭropo kaj precipe Germanujo jubilas pri tio, ke Joe Biden nun anstataŭis Donald Trump en la Blanka Domo. Ĉu jubilas ankaŭ vi ?

Ambasadoro WU : Vi scias, ke la rilatoj inter Ĉinujo kaj Usono en la pasintaj jaroj sub la registaro de s-ro Trump estis sufiĉe malfacilaj. Kelkaj el la membroj de lia registaro uzis la pensŝablonojn de la Malvarma Milito kaj provis ĉirkaŭdigi Ĉinlandon. Tamen ĉiam ekzistis ankaŭ klopodoj por bonaj interrilatoj. En 2020 ni havis kvar novajn urbo-ĝemeliĝojn en Usono kaj laŭ enketo de la usona ĉambro pri komerco en Ĉinujo, 87 elcentoj de la usonaj entreprenoj diris, ke ili ne havas planojn por forigi sian produktadon en Ĉinujo.

WirtschaftsWoche : La demando tekstis, ĉu vi ĝojas pri la venko de Joe Biden ?

Ambasadoro WU : La enoficiĝo de la Biden-administracio estas ŝlosila momento por la rilatoj inter Ĉinujo kaj Usono. Antaŭ ni troviĝas grandaj ŝancoj kaj defioj, sed ankoraŭ ni ne scias, en kiun direkton tio evoluas. Tio estas grava tasko por ambaŭ landoj.

WirtschaftsWoche : Almenaŭ la ttransatlantika interrilato rapide reboniĝos kun Joe Biden. Tio certe ne estas laŭ via deziro …

Ambasadoro WU : Nia celo estas meti la interrilatojn entute sur antaŭvideblan kaj konstrueman evolupadon. Ni volas pacan kunekzistadon kaj situacion de komuna gajno inter Ĉinujo kaj Usono – kaj tio certe kongruas ankaŭ kun la atendoj de la EU.

WirtschaftsWoche : Tamen en la EU kaj ankaŭ en Germanujo ekzistas multaj, kiuj esperas, kune kun Usono, povi konstrui ian "komercan NATO-n" kiel kontraŭpezon al Ĉinlando.

Ambasadoro WU : Mi pensas, ke dupolusa mondo estas nek en la ĉina nek en la eŭropa intereso. Ĝuste Eŭropo devus esti, komune kun Ĉinujo, subtenanto de multpolusa mondordo. Tio koncernas ankaŭ la demandon, kiom la EU volas agadi memstare. Mi kredas, ke por tio validas ankaŭ la frazo de la federacia kancelierino Angela Merkel : "Ni eŭropanoj devas preni nian sorton en nian propran manon".

WirtschaftsWoche : Sed la evolu iras ĝuste en alian direkton. Joe Biden volas kune kun Eŭropo konstrui okcidentan unuec-fronton kontraŭ Ĉinujo, tion li nun diris plurfoje. Kaj via prezidanto ja ankaŭ jam parolas pri la "nova malvarma milito".

Ambasadoro WU : La ŝtatprezidanto Xi Jinping ĵus ĉe Davoso avertis kontraŭ tio kaj diris, ke fendita mondo ne kapablas sukcesi la grandajn defiojn de nia tempo. Kurso de alfrontiĝo kondukus nin nur en sakstraton. Mi havas ankaŭ la impreson, ke tiu ĉi opinio estas kundividita en Eŭropo kaj aparte en Germanujo, ĉar ĝuste ĉi tie oni ja faris la plej dolorajn spertojn per la Malvarma Milito. Ni rifuzas ĝin same kiel malkupladon de la ekonomio kaj ni esperas, ke ankaŭ Usono atingos tiun komprenon. La pensmodeloj de la Malvarma Milito ne estas taŭgaj por nia tempo. Ĉinujo volas multpolusan mondon, nur tiel grandaj problemoj kiel la klimata ŝanĝiĝo kaj la korona pandemio solveblas.

WirtschaftsWoche : Tion Usono evidente vidas alie. La homoj de Biden aktuale serĉas en Eŭropo subtenon por bojkoto de la Olimpiaj Ludoj de 2022 en Pekino.

Ambasadoro WU : Lingva akreco ne estas bona diplomatio. Problemo solveblas nur en dialogo, ne en alfrontiĝo. La ŝtatprezidanto Xi en sia gratulletero al la prezidanto Biden esprimis la deziron ree pli bone kune labori kaj konduki la interrilatojn al konstrueman kurson, sen konflikto nek alfrontiĝo kaj kun reciproka respekto

WirtschaftsWoche : Se kun tio ne kongruas la bojkoto de la olimpiaj ludoj …

Ambasadoro WU : La demando de la vintraj olimpiaj ludoj de 2022 en Pekino prefere ne estu politikigota. La atletoj de ĉiuj landoj antaŭĝojas la ludojn kaj la preparoj estas plene evoluantaj.

WirtschaftsWoche : La instigon por prepari bojkoton liveras Ĉinujo mem. Temas pri la rompoj de homrajtoj en via lando, la disbato de la demokrati-movado en Honkongo kaj antaŭ ĉio pri la subpremado de la ujguroj. Kontraŭ tio protestas ankaŭ multaj NRO-oj.

Ambasadoro WU : Mi havas la impreson, ke egale kion la ĉina regustaro faras, okcidentaj komunikiloj rapide verdiktas : Pekino subpremas. En tiu ĉi tempo antaŭ jaro germanaj gazetoj skribis, ke Ĉinujo per sia Lockdown subpremas sian loĝantaron. Sed la vero estas alia. Tio validas ankaŭ pri la raportado pri la politiko de Ĉinujo pri malplimultoj. Ĉiuj etnaj grupoj en Ĉinujo estas egalrajtaj kaj diskriminacio kaj subpremado de ĉia etna grupo estas malpermesataj. …

WirtschaftsWoche : Sed S-ro Ambasadoro, ĉu vi volas serioze aserti, ke ĉiuj ĉi raportoj, kiuj parte devenas pri okulaj atestantoj, estas libere inventitaj ?

Ambasadoro WU : Se oni parolas kun la anoj de la etnaj malplimultoj en Ĉinujo surloke, tiam oni ricevas certe tute alian bildon ol tion, kion kontraŭĉinaj "aktoroj" volas kredigi al la monda publiko.

WirtschaftsWoche : Tio sonas kvazaŭ propagando el la Malvarma Milito. Ĉu vi do restas ĉe la eldiro, ke la subpremado de la ujguroj en via lando estas pura okcidenta propagando ?

Ambasadoro WU : Tio estas mensogo disvastigita de kontraŭĉinaj politikistoj kiel sinjoro Pompeo.

WirtschaftsWoche : Ĉu trudlaboro kaj aliedukaj koncentrejoj estas ankaŭ inventaĵoj ?

Ambasadoro WU : La tiel nomata trudlaboro estas frapvorto de celata fiiga kampanjo kontraŭ Ĉinujo. En Xinjiang, same kiel en aliaj partoj de Ĉinujo, la laborrilatoj baziĝas sur libervole faritaj laborkontraktoj. Sed en la kunteksto de Xinjiang vi devas vidi, ke tie de 1990 ĝis 2016 okazis miloj da teroraj atencoj. Niaj sekurecfortoj elpaŝis kontraŭ tio en la kadro de la leĝoj kaj samtempe ni vetas pri malradikaligo kaj profesia instruado. Nun miloj da turistoj ree vizitas la provincon kaj inter ili ankaŭ multaj eksterlandanoj.

WirtschaftsWoche : Tiam vi certe ne kontraŭas, se la UNO-Alta komisariino pri Homrajtoj vizitos la Aŭtonoman Regionon.

Ambasadoro WU : Xinjiang estas malfermita regiono kaj ekzistas nenio, kion oni ne rajtas vidi. Ankaŭ eksterlandaj vizitantoj estas bonvenaj, por tie fari al si bildon per siaj propraj okuloj. En la lastaj jaroj pli ol 1200 reprezentantoj el pli ol 100 landoj vizitis Xinjiang-on …

WirtschaftsWoche : … sed ankoraŭ ne la UNO-Alta komisariino pri Homrajtoj.

Ambasadoro WU : Ĉinujo jam antaŭ longa tempo eldiris inviton, kaj ŝi ne venis. Aktuale ni estas parolantaj pri detaloj por tiu vizito. Ni invitis ankaŭ reprezentantojn de la EU, sed ili ĝis nun lasas nin atendi.

WirtschaftsWoche : Kion pri la aliedukajn koncentrejojn en Xinjiang ?

Ambasadoro WU : Ne ekzistis nek ekzistas tiel nomataj "aliedukaj koncentrejoj" en Xinjiang. Tio, kion ni havis, estis laŭleĝe instalitaj profesinstruaj centroj …

WirtschaftsWoche : Tion kontraŭdiras sennombraj okulaj atestantoj. Ili parolas pri koncentrejoj.

Ambasadoro WU : Bedaŭrinde mi devas diri, ke oni tre multe mensogis. Multaj memnomumintaj okulaj atestantoj eĉ ne estis en profesi-instruaj centroj. Per la centroj la nutra grundo por religia ekstremismo estis sekigita kaj la homoj minacataj de ekstremismo estis helpataj por atingi pli bonan estontecon.

WirtschaftsWoche : Ĵus vi ankoraŭ parolis pri profesi-instruaj centroj.

Ambasadoro WU : Jes, tiuj ne esence diferencas de la "kontraŭ-ekstremismo-centroj" en Francujo aŭ de similaj institucioj en Usono. Per la dispozicioj la situacio en Xinjiang tre pliboniĝis, jam de kvar jaroj ne okazis terora atenco. Fine de 2019 ĉiuj partoprenantoj en la kursoj en la profesi-instruaj centroj faris diplomon kaj la plej multaj el ili trovis laborlokojn.

WirtschaftsWoche : La demando de homrajtoj apartenas al la aktuale okazanta debato pri la alpreno de politika pozicio de Usono, de Ĉinujo kaj de la EU. Eŭropo timas esti disfrotota en la luktado de tiuj ĉi du superpotencoj laŭ la slogano "por ni aŭ kontraŭ ni". Ĉu vi povas kompreni, ke Eŭropo ne volas meti sin sur unu flankon ?

Ambasadoro WU : Ĉinujo konsideras Eŭropon kiel gravan partneron kaj ne kiel rivalon. Nia plej grava komuna tasko estas la solvado de la tutmondaj problemoj kaj la kreado de multpolusa mondo. Ĉinujo ĉiam pretas subteni la eŭropan integriĝ-procezon, apogi la EU ĉe la fortigo de sia strategia aŭtonomeco. Per pli da kunlaborado la EU kaj Ĉinujo povas krei pli da stabileco kaj pli da bonstato.

WirtschaftsWoche : Sed se vi volas kunlaboradon anstataŭ rivalecon, kial tiam oni kreis la formon 17plus 1 ? Multaj vidas tion kiel pekinan instrumenton por subfosi la EU.

Ambasadoro WU : Tiu ĉi platformo estas kreita por superregiona kunlaborado inter Ĉinujo kaj la mez- kaj orient-eŭropaj landoj ; ĝi estas malfermita, travidebla kaj inkluda. Reprezentantoj de la EU estas ĉiam invitataj al la pintkunveno. Vidu, la komerca volumeno inter Ĉinujo kaj Germanujo estas preskaŭ 200 miliardoj da eŭroj, sed la volumeno inter Ĉinujo kaj la 17 landoj atingas eĉ ne 100 miliardojn da eŭroj. Se ni en la kadro de tiu formato pli kunlaboras kun tiuj landoj, tio fine servas al ekvilibrigita evoluo en la tuta Eŭropo.

WirtschaftsWoche : Sed ĉu ne ankaŭ la projekto de la Silka Vojo, en kiu EU-landoj kiel Italujo kaj Greklando partoprenas, ne estas iniciato por fendi Eŭropon ?

Ambasadoro WU : Celo de la nova Silkovojo estas krei grandan ekonomian projekton por la bono de ĉiuj. Mi ne povas kompreni, kiel Ĉinujo povas profiti el fendita Eŭropo, kaj tio ankaŭ ne estas en nia intereso. Fine la EU estas unu el la plej grandaj komercaj partneroj de Ĉinujo kaj de jardekoj Ĉinujo flegas ĉiujaran pintkunvenon kun la EU.

WirtschaftsWoche : Se Ĉinujo volas tiom da partnereco, kial via lando tiam metas al si la celon esti ĝis 2035 la plej potenca lando de la mondo ?

Ambasadoro WU : Nia deklarita celo estas, ĝis 2035 atingi la socialisman moderniĝon. Ni ne celas fariĝi superpotenco. Anstataŭ tion, ni volas unuavide fari ĉion por plibonigi la vivon de niaj 1,4 miliardoj da homoj en Ĉinujo.

WirtschaftsWoche : Do, ĉu Ĉinujo ne volas domini aliajn landojn ?

Ambasadoro WU : Ne, tio ne estas nia celo.

WirtschaftsWoche : Via vakcin-diplomatio parolas alian lingvon. La ŝtataj komunikiloj de Ĉinujo fifamigas produktojn kiel Biontech, ili parolas pri sennombraj mortintoj ekzemple en Norvegujo, kaj Ĉinujo samtempe proponas sian vakcinon de Sinopharm mondvaste, ankaŭ en Eŭropo.

Ambasadoro WU : Kion ĉinaj komunikiloj citas, tio staras ankaŭ delonge en la okcidentaj komunikiloj. Dum aktuale multaj landoj disputas pri vakcinoj, Ĉinujo proponas kunlaboradon, ankaŭ por landoj, kiuj ne disponas pri propra vakcino. Por ni estas tute klare, ke la disvolvado de vakcino ne estas konkurado inter la nacioj, sed batalo de la nacioj kontraŭ la viruso.

WirtschaftsWoche : Kial tiam la propagando kontraŭ Biontech kaj aliaj eŭropaj produktantoj ?

Ambasadoro WU : Ni ne faris propagandon, sed ni staras en densa kunlaborado kun la Monda Organizaĵo pri Sano MOS, por povi proponi vakcinojn ankaŭ al la pli malriĉaj landoj kiel tutmondan publikan havaĵon kaj por povi ĝin fari pli atingebla. Ĝis nun, laŭ la MOS, en 130 landoj de la suda mondo ankoraŭ neniu estas vakcinita, tie urĝe devas io okazi.

WirtschaftsWoche : Spite al ĉiaj diferencoj, Ĉinujo kaj la EU post jarojn longaj intertraktadoj nun interkonsentis pri invest-kontrakto. Kio, laŭ vi, estis la plej malfacila punkto ?

Ambasadoro WU : La interkonsento estis granda sukceso por ĉiuj partoprenantoj kaj ĝi nun malfermas gigantajn ŝancojn por germanaj kaj eŭropaj entreprenoj en Ĉinlando. Pro tio ni vidas ĝin ankaŭ kiel impulsanton por resaniĝo de la monda ekonomio post la pandemio, ĉar ĝi forigas multajn ĝis nun ekzistantajn malhelpojn por investoj.

WirtschaftsWoche : Kio, koncize, estas la plej gravaj punktoj ?

Ambasadoro WU : Ni trovis interkonsenton en kvar gravaj kampoj, nome pli bonaj devigoj por aliro al la merkatoj, klaraj reguloj por konkurado, la emfazo de daŭrigebla disvolvado kaj novaj reguloj por solvi disputojn.

WirtschaftsWoche : Kio, laŭ vi, estis la plej granda koncedo de la ĉina registaro al la EU ?

Ambasadoro WU : Tiu ĉi estas altvalora, ekvilibra interkonsento kaj kreas klasikan situacion de reciproka gajno. Ĝi entenas sistemon de mastrumado por eksterlandaj rektaj investoj en sektoroj, kiuj antaŭe ne disponeblis, precipe en la kampo de servoj , ekzemple ĉe financoj, nubaj servoj kaj privata san-antaŭzorgo, sed ankaŭ en la internacia martrafiko. Malfermita merkataliro en Ĉinujo ekzistas nun ankaŭ por veturiloj kun alternativaj motoroj.

WirtschaftsWoche : Ĉu al via registaro la rezigno pri la devigo je joint-venture ne estis aparte malfacila ?

Ambasadoro WU : Ekde la aliĝo de Ĉinujo en 2001 al la MOK la devigo je joint-venture estas laŭpaŝe malstriktigata. Fine de 2017 jam du trionoj de la germanaj entreprenoj estis centelcente eksterlande financataj. La pordo de Ĉinujo al la mondo estos ĉiam pli larĝa.

WirtschaftsWoche : La interkonsento estas ankoraŭ ratifenda de la EU-parlamento, kie hajladas kritiko. Tutcerte okazos multnombraj deziroj de modifado ĉe la normoj pri daŭrigeblo, precipe en la kampo de protekto de laboro kaj medio. Ĉu vi tion jam enkalkulis ?

Ambasadoro WU : Estas klare, ke la parlamentanoj nun ekparolas, ili antaŭe ja ne estis partoprenintaj, nek la EU-parlamento nek la ĉina Popolkongreso. Sed gravas, ke la intertraktadoj nun principe estas finitaj. Ĉinujo per sia ĝis nun plej ampleksa propono montris sian sinceron. Prokrastado de la ratifo ne estas en la eŭropa intereso.

WirtschaftsWoche : Ĉu vi allasos sendependan kontroladon, ekzemple ĉe la labor- aŭ medi-protekto ?

Ambasadoro WU : Ni respektas la internaciajn normojn en tiuj kampoj, sed tenas nin en nia lando je la leĝoj validaj por ni, tiel kiel ĉiu alia lando ankaŭ faras. Cetere, tio ĉi estas la unua fojo, ke labornormoj eniris en duflankan kontrakton kun Ĉinujo.

WirtschaftsWoche : Kiom forte germanaj entreprenoj nun povas fidi, ke ili ĉe la publikaj adjudikadoj en Ĉinujo estos konsiderataj ? Ĉe la konstruado de retoj laste 80 elcentoj de la mendoj iris al ĉinaj firmaoj.

Ambasadoro WU : Publikaj adjudikadoj ne estas parto de nia investkontrakto. Ni traktas ĉiujn en Ĉinujo registritajn entreprenojn inkluzive de eksterlandaj ĉe la publikaj mendoj same. Aktuale ni laboras por rapidigi la proceduron de aliĝo al la GPA. Pri tio ni volonte parolas kun la EU en la kadro de estontaj liberkomercaj interparoladoj.

WirtschaftsWoche : Kiel statas la disputo pri la uzado de Huawei-komponantoj en eŭropaj retoj ?

Ambasadoro WU : En tiu ĉi disputo ni ree vidas kampanjon de Usono kontraŭ Ĉinujo. De 20 jaroj Huawei laboras en la germana merkato de telekomunikaĵoj. Tiu ĉi sukceso ĝenis la Trump-registaron, pro tio ĝi agadis kontraŭ ĝi per ĉiaj penseblaj sankcioj kaj minacoj. Oni asertis, ke konstrupartoj de Huawei estas malsekuraj, sed eĉ post jaroj pri tio ekzistas eĉ ne la plej eta pruvo. Usono volas defendi sian monopolon en la IT-kampo ĉiarimede. Mi esperas, ke la germana registaro daŭre alte konsideras la principon de malfermitaj merkatoj kaj de egaleca traktado.

WirtschaftsWoche : Germanujo kaj Francujo intertempe havas tiom da komerco kun kaj en Ĉinujo, ke ili eĉ ne povas pensi pri bojkoto, se ili ne volas fini kiel Aŭstralio. Ili fariĝis ĉantaĝeblaj.

Ambasadoro WU : Komerco baziĝas sur reciprokeco kaj kreas interdependecon. Kiel ambasadoro mi devas ĉi tie en Germanujo zorgi pri malfermita, justa kaj nediskriminacia komerca medio, sed ne pri tio, ĉu unuopa firmao faras aŭ ne faras grandan negocon.

WirtschaftsWoche : En Eŭropo estas multaj plendoj pri la ŝtata subvenciado de ĉinaj entreprenoj kaj investistoj. Kiajn paŝojn via registaro faras por ĉi-kampe garantii, kiel promesite, pli da travideblo ?

Ambasadoro WU : Travideblo estas la esenco de ĉia investkontrakto. Ni interkonsentis pri devigoj de travideblo por la servoj. Krome ambaŭ flankoj devontigas sin je konsultadoj, kiam okazas malkonsentoj pri publikaj subvencioj.

WirtschaftsWoche : Unu el la plej gravaj tutmondaj temoj estas la klimat-protekto. La EU kaj Usono volas ĝis la jaro 2050 fariĝi klimat-neŭtralaj, Ĉinujo nur en 2060. Kiom da konflikto troviĝas en tiuj ĉi malegalaj celoj ?

Ambasadoro WU : Mi vidas en tio pli ĝuste eblecojn de kunlaborado anstataŭ konflikton. La ŝtatprezidanto Xi Jinping ĉe la UNO anoncis, ke Ĉinujo strebas fariĝi klimatneŭtrala antaŭ 2060 kaj atingi la pinton de CO2-ellasoj en 2030. Por tio ni altigos la arbar-amplekson je ses miliardoj da kubikmetroj kaj la instalitan produktadon de sun- kaj vent-energio al pli ol 1200 gigaŭatoj.

WirtschaftsWoche : Tamen Ĉinujo en la venontaj jaroj konstruas kun distanco ankaŭ la plej multajn karbocentralojn de la mondo. Kial vi ne povas rezigni je karbo aŭ almenaŭ malgrandigi tiun energibranĉon ?

Ambasadoro WU : La plej grava principo en la internacia klimatprotekto estas komuna, sed diferencigita respondeco. Ĉinujo laŭ siaj donitaĵoj faris multajn dispoziciojn. La parto de karbo ĉe la ĉina energi-miksaĵo malalitiĝis de 72,4 elcentoj en la jaro 2005 al laste 57,7 elcentoj. En la 14-a kvinjarplano ni pliakrigos la regulojn.

WirtschaftsWoche : La Popolkongreso post malmultaj tagoj decidos pri la nova kvinjarplano – ankaŭ kiel gvidlinio por la ĉina ekonomio kun tutmonda efiko. Kiuj punktoj laŭ vi estas la plej gravaj por la eŭropaj entreprenoj ?

Ambasadoro WU : Ĉinujo per tiu ĉi 14-a kvinjarplano volas eldoni signalon de decidemo por sia politiko progresigi la malfermiĝon kaj subteni novkreadojn. Por Germanujo kaj la cetera mondo per tio ekzistas pli da eblecoj partopreni en la fruktoj de la ĉina evoluo.

WirtschaftsWoche : Kion tio signifas konkrete ?

Ambasadoro WU : Ni havas 1,4 miliardojn da homoj, el kiuj 400 milionoj apartenas al la meztavolo. Ni proponas gigantan merkaton – pasintjare la ĉinaj konsumantoj, spite al Korono, konsumi ankoraŭ pli ol kvin bilionojn da eŭroj – kaj 42 elcentoj de la germanaj entreprenoj povis kreskigi sian gajnon en Ĉinujo. Kaj en la venontaj dek jaroj Ĉinujo volas importi varojn en la valoro de 22 bilionoj da usonaj dolaroj – la ŝancoj por germanaj eksportistoj estas grandegaj.

WirtschaftsWoche : En kiuj kampoj aparte ?

Ambasadoro WU : En la kampo de scienca kunlaborado ĉe cifereca teĥnologio, industrio 4.0, artefarita inteligento, aŭtonoma stirado kaj en biomedicino kaj energi-sistemoj kaj fine ĉe verdaj temoj. La luktado kontraŭ la klimatŝanĝiĝo estas estonte la kunlabora temo kun la plej granda potencialo. La nova kvinjarplano de la Popolkongreso estos tre grava – ne nur por Ĉinujo, sed por la tuta monda ekonomio.

WirtschaftsWoche : En la kvinjarplano temos ja ankaŭ pri nova disvolvomodelo por Ĉinujo. Ĉu vi preparas vin por malkuplado de Ĉinujo disde la monda ekonomio, kian Usono antaŭenigas ?

Ambasadoro WU : Vi parolas pri la nova disvolvomodelo de la duobla cirkulado. Tio fariĝos unu el la angulŝtonoj de la kvinjarplano. Unuflanke Ĉinujo koncentriĝas pli forte al la interna ekonomio. Aliflanke ni agadas por tio, ke la ekstera kaj interna ekonomio pli bone kompletigu unu la alian. Tio signifas, ke la cirkulado aŭ la interŝanĝo de varoj, servoj kaj kapitalo kun eksterlando devas esti levita al pli alta nivelo.

WirtschaftsWoche : Do, ĉu ne malkupladon ?

Ambasadoro WU : Ne, tio estus tute malĝusta. Samtempe Ĉinujo aliĝis al la RCEP, la plej granda liberkomerca zono de la mondo, kaj finis la intertraktadojn pri la investkontrakto kun la EU. Tio montras, ke la duobla cirkulado tute ne estu fermita interna cirkulado, sed malfermita cirkulado kun la monda ekonomio. Sed kun pli forta interna merkato ni altigas la rezistemon de nia ekonomio kontraŭ eblaj malfacilaĵoj kiel protektismo, unuflankismo aŭ ĝenoj ĉe la tutmondaj liverĉenoj.

WirtschaftsWoche : La limigoj por vojaĝoj al Ĉinujo estis ekstreme akrigitaj pro la koronviruso, preskaŭ triono de la germanaj entreprenoj, laŭ enketo de la AHK, ne povas tie fari urĝajn negocojn kaj servojn. Ĉu ekzistas la ŝanco ke la striktaj kondiĉoj estos malstriktigotaj, kiam germanaj vizitantoj estos vakcinitaj ?

Ambasadoro WU : Efektive lastatempe mi ricevis multajn alskribojn pro tiu problemo. Normale Ĉinujo sekvas vizitantofavoran politikon pri envojaĝo kaj vizoj. Sed pro la pandemio internaciaj vojaĝoj fariĝis pli malfacilaj. Multaj landoj faris limigajn dispoziciojn pri envojaĝo. Kiam tiuj reguloj estos malstriktigotaj aŭ nuligotaj, tio esence dependas de la evoluo de la pandemio.

WirtschaftsWoche : Por la reciprokaj negocoj tio estas ekstreme malfacila …

Ambasadoro WU : Pro tio ni klopodas por aparta regulado por envojaĝantaj komercistoj, por speco de "fast track". Tiel en 2020 jam preskaŭ 3000 germanaj komercistoj vojaĝis en Ĉinujon. Tiom longe, kiom la pandemio ne ĉesis, mi konsideras senchava fari komune internaciajn normojn por vojaĝoj.

WirtschaftsWoche : Ĉu tiu "fast-track-regulo" etendeblas, ekzemple post farita vakcinado ?

Ambasadoro WU : Pri tio ni devas ankoraŭ paroli kun niaj germanaj partneroj. Pasintjare ja multaj germanoj vojaĝis al Ĉinujo, sed bedaŭrinde tio estis vojo unudirekta.

WirtschaftsWoche : Ĉu tio signifas, ke la ĉinoj ne rajtis vojaĝi al Germanujo ?

Ambasadoro WU : Ni ja havis malfacilaĵojn, kaj pro tio mi vidas tie bezonon de interparolado.

WirtschaftsWoche : Lasta demando : Ĉu vi intertempe scias, de kie venas tiu Kovid-19-viruso ?

Ambasadoro WU : La laŭspurado de la viruso estas kompleksa scienca afero, kiu postulas kunlaboradon de fakuloj en la tuta mono. Ĉinujo tiurilate estas ĉiam malfermita kaj travidebla en plej densa komunikado kun la MOS, en tiu ĉi momento MOS-delegitaro kun fakuloj estas en Vuhano. Venas ĉiam pli da internaciaj raportoj, laŭ kiuj la viruso en la dua duono de 2019 aperis en pluraj lokoj de la mondo. Tio montras la neceson kaj urĝon plani similajn vizitojn en aliaj landoj kaj regionoj.

La demandojn faris Beat Balzli kaj Daniel Goffart. Elgermanigita de Vilhelmo Lutermano la 27-an de Februaro 2021. Fonto : http://german.china.org.cn/txt/2021...