Monda ASEMBLEO Socia (MAS)  [<<<]
Parolado kadre de la 50-a datreveno de "Le Monde diplomatique"
de Evo MORALES  
5a januaro 2006

Okaze de la grandioza venko de Evo Morales en la boliviaj prezidant-elektoj de decembro 2005, kaj de lia movado Movimiento Al Socialismo (MAS) (vd Maurice Lemoine, "Tondrobato en Bolivio"), do de nia samsiglano, ni aperigu - almenau parte - lian paroladon kiun li faris en la kadro de Le Monde diplomatique en Parizo. - vl

Parolado de Evo Morales

Okaze de la 50a-a datreveno de Le Monde diplomatique, la 8-an de marto 2004, antaŭ 4.000 homoj kunvenintaj en la Pariza sportpalaco, iuj el la plej grandaj intelektuloj kaj iuj el la precipaj animantoj de la mondaj sociaj movadoj kunvenis por paroli pri kion signifas la vorto « rezistado ». S-ro Evo Morales estis inter ili. Eltiraĵo de lia interveno.

En Ameriko, dum pli ol kvin jarcentoj, ni rezistis al la politikoj de submetado, de sklavigo, de marĝenigo de la indiĝenaj popoloj. Fine de 500 jaroj, la 12-an de oktobro 1992, ni decidis pasi de rezistado al potencopreno de la indiĝenaj popoloj. En Bolivio, en tiu procezo de potencopreno, ni organizis politikan instrumenton de la popolo kiu estas la Movado Al Socialismo.

En la mezuro laŭ kiu ni organizis nin, partoprenante demokratie en la atingo de la politika potenco, ni ricevis permanente minacojn de la usona imperiismo. Dum la socialaj kaj komunumaj bataloj de la jardeko 1970, oni akuzis nin esti « ruĝaj », esti komunistoj ; en 1980, 1990, oni traktis nin kiel drogokomercistojn, poste, ekde la 11-a de septembro 2001, oni akuzis nin pri terorismo, dum ni provis rehavi niajn teritoriojn.

Ekzemplo de tiuj akuzoj : en la bolivia taggazeto La Prensa de la 8-a de decembro 2001, la usona eksambasadoro diris : « Evo Morales estas anda Ben Laden kaj la kokao-produktistoj, la kamparanoj, talibanoj. »

Kiam, unuafoje, ĉe la kapo de la indiĝenaj popoloj, ajmara, keĉua, gŭarania, kaj de aliaj sektoroj de laboristoj, de intelektuloj, de profesiuloj, ni prezentis nin por la elektoj, la usona ambasadoro premis la elektantojn, kelkajn tagojn antaŭ la voĉdonado, ke ili ne voĉdonu por Evo Morales. Sed, anstataŭ timigi la popolon, li nur provokis ĝian ribeladon kaj, tiusence, mi povas diri ke li estis mia plej bona kampanjo-gvidanto !

Mi ŝatus montri al vi, per tiuj informoj, la gravecon de la entrudiĝo de Usono en mian landon. Elde la Blanka Domo, la 1-an de marto 2003, oni akuzis « Evo-n » partopreni en bolivara armeo. Jes, ni estas bolivaranoj ! Kaj aparte, mi estas « ĉavisto », kamaradoj. Sed oni diris ankaŭ ke Evo Morales estas financata de la Revoluciaj Armitaj Fortoj de Kolombio. Tio estas falsa.

Ni povus longe paroli pri tiuj akuzoj lanĉitaj de la usona registaro... Lastan jaron, post la ribelo de la indiĝenaj kaj kamparanaj popoloj de Bolivio, oni akuzis min esti ricevinta monon de Chávez por renversi la prezidanton [Gonzalo Sánchez de Lozada].

Kion mi povas diri al vi, estas ke ni, la indiĝenaj popoloj, ni estas la morala rezervo de niaj teroj. Niaj vivoformoj estas fundamente bazitaj sur niaj normoj, kiuj estas : ne ŝteli, ne mensogi, ne esti malfortaj.

Aliaj minacoj... La 11-an de januaro 2004, Bush koleris kontraŭ Nestor Kirchner, pro la argentina apogo al Evo Morales.

Kiel eblas ke la registaro de Usono, elde la Blanka domo, akuzas nin pro drogokomerco ? Kiel eblas ke la unua teroristo de la mondo nin akuzas, nin indiĝenajn popolojn, nin kiuj estas kiom ne eblas pli demokratiaj, esti teroristoj ?

Ni, la kondamnitoj, ni minacataj je ekstermado, ni la indiĝenaj popoloj, ni decidis rehavi nian teritorion, kio signifas : ne permesi privatigon nek koncesiigon de la naturresursoj, ĉu arbaraj ĉu minaj ; ne permesi ke la bazaj servoj fariĝu aferoj inter la manoj de la privato. Ekde la momento en kiu la bazaj servoj pasas en privatajn manojn, okazas rompo de la homaj rajtoj.

Ĝis nun, ni liveris grandan batalon, forpelante kelkajn transnaciulojn [de la akvo] por defendi la vivon, elde Bolivio (...). Kion mi volas diri, gekamaradoj, estas ke nia batalo, fundamente, en tiu ĉi nova jarmilo, estas batalo por la digno, por la identeco kaj por la humaneco. Kaj, speciale, por la memdeterminado de la popoloj.

Usono, kun sia kruelaĵoj, kun sia aroganteco, povas interveni facile kontraŭ popoloj, kontraŭ landoj, sed neniam ili povos regi ilin. Se ni volas akiri pacon kaj socian justecon en la mondo, ni ne havas alian alternativon ol ĉesigi la nordamerikan imperiismon.

Multan dankon.

Elfrancigita de Vilhelmo Lutermano por Monda Asembleo Socia (MAS)