Monda ASEMBLEO Socia (MAS)  [<<<]
Pierre Laurent : "Estas defio rezisti al tiuj koloniismaj praktikoj"
de Pierre LAURENT  
17a julio 2015

Por la nacia sekretario de la FKP kaj prezidanto de la Partio de la Eŭropa Maldekstro, « eŭropa socia kaj politika fronto kun senprecedenca amplekso » estas pli necesa ol iam ajn antaŭe.

[La franca prezidanto] François Hollande gratulis sin, hieraŭ, ke li evitis la « grexit » [la eliron de Grekujo el la eŭrozono], ĉu Francujo ludis plene sian rolon ?

Pierre Laurent : Ne, Francujo tre malfrue eniris la intertraktadojn, post kiam ĝi dum monatoj lasis Grekujon sola fronte al la ĉantaĝoj de la financistoj. Ĝi poste agis por eviti la grexit, estas vere. Sed sen malebligi interkonsenton, kiun la grekoj pagis altpreze sub akraj kondiĉoj, kiuj atencas ilian suverenecon. La germanoj volis dekomence la grexit kaj, ĉar ili ne ricevis ĝin, volis puni la grekan popolon. Francujo devintus leviĝi kun multe pli da forto kontraŭ tiuj kondiĉoj, kiuj estas honto por la demokratia Eŭropo.

Ĉu tiu ĉi interkonsento estas plenumebla, dum ĝi fortigas la premon de malabundo ?

Pierre Laurent : Tiu ĉi interkonsento evitas la grexit kaj konservas, sub kondiĉoj, la eblecon de refinancado de Grekujo. Sed ĝi ankaŭ starigas novajn disponojn de malabundo kaj kuratorecon, kiuj kontraŭefikas la produktivan kaj socialan relanĉiĝon de la lando. La disponoj, kiuj troviĝas en ĝi, estas maljustaj, ekonomie kontraŭproduktivaj kaj demokratie profunde kontestindaj. La greka ĉefministro, kiu rezistis al la ĉantaĝo de la grexit, malebligis al Germanujo atingi tiun punkton. Ni ne subtaksu la premsonĝon, ke tio signifus por la greka loĝantaro kaj por la tuta Eŭropo. La ekstrem-maldekstro ne senkiale frotis al si la manojn atendante la realiĝon de tiu katastrofa scenaro. Sed kompense Germanujo postulis malhumanan kaj skandalan prezon. Estas defio rezisti al tiuj koloniismaj praktikoj por ĉiuj eŭropaj popoloj.

Kion la koministoj defendos dum sia voĉdonado pri tiu ĉi interkonsento, ĉi-posttagmeze ?

Pierre Laurent : Niaj parlamentaj grupoj kunvenas ĉi-matene por decidi pri tio. Tiu decido konsideros du postulojn. Unue, la absolutan neceson de solidareco kun la greka popolo, kun niaj kamaradoj de Sirizo kaj kun Aleksis Cipras. Sed devas esti klara, ke ni ne povas subteni la enhavon de interkonsento, kiu estis en ĉiuj punktoj konceptita de la germanaj gvidantoj por humiligi la grekan popolon. Ni provos en la parlamento kiom eble plej klare aŭdigi tiun voĉon, per kiu ni alvokas la francojn, Francujon kaj, krome, ĉiujn eŭropajn demokratiajn fortojn pli forte agadi por la demokratia refondado de la Eŭropa Unio kaj por la emancipiĝo el la neeltenebla kuratoreco de la financaj merkatoj.

La eŭropaj gvidantoj volis doni lecionon al tiuj, kiuj pensas ke eblas alia vojo ol malabundo. En tiu ĉi kunteksto, kiel la batalo por solidara Eŭropo fareblas ?

Pierre Laurent : Doni lecionon al la popoloj, kiuj levas la kapon, estis dum ses monatoj la obsedo de la eŭropaj gvidantoj. Ili neniam serĉis veran interkonsenton, kiu konsideras la voĉdonon de la greka popolo. Por krei la fortrilaton necesan por sociala refondado de Eŭropo oni ne povas ĉirkaŭiri potencan engaĝiĝon de la eŭropaj popoloj kaj la proksimiĝon de ĉiuj politikaj, sindikataj, socialaj fortoj. Tiuj eŭropaj gvidantoj esperas ke per tiu ĉi interkonsento ili fermis la grekan krampon. Sed, male, la eŭropa batalo nur komenciĝis kaj ni devas kompreni, ke por gajni ĝin ĝi bezonas la konstruadon de eŭropa socia kaj poltitika fronto kun tute senprecedenca amplekso. Ĝuste en tiu spirito ni faros novajn iniciatojn kaj ni faros la Feston de l’Humanité granda batalkunveno de ĉiuj eŭropanoj kontraŭ la malabundo.

Elgermanigita de Vilhelmo Lutermano