Monda ASEMBLEO Socia (MAS)  [<<<]
Alvoko al Internacia Konferenco pri Klimatŝanĝo
de Evo MORALES  
22a januaro 2010

Alvoko de Evo Morales al la Internacia Konferenco pri Klimatŝanĝo en Bolivio, de la 20-a ĝis 22-a de aprilo 2010

Ambasadejo de Bolivio en Francio

Gazetara komunikaĵo - E BFR-n-ro 018/09

PUBLIKA ALVOKO DE LA PREZIDANTO DE BOLIVIO,

EVO MORALES AYMA

al ĉiuj defendantoj de nia planedo

por la Monda Konferenco de la Popoloj pri la Klimatŝanĝo kaj pri la ratoj de la Patrino Tero en Koĉabambo, Bolivio, de la 20-a ĝis la 22-a de aprilo 2010

Konsiderante ke la klimatŝanĝo estas reala minaco por la eksistado de la homaro, de la vivantaj estaĵoj kaj de nia Patrino Tero tia kian ni konas ĝin hodiaŭ,

Konstatante la gravan minacon por la insuloj, la marbordaj zonoj, la glaciejoj de Himalajo, de Andoj kaj de la montaroj de la mondo, la polusoj de la Tero, la varmaj regionoj kiel Afriko, la akvofontoj, la loĝantaroj tuŝataj de kreskantaj naturkatastrofoj, la plantoj kaj la animaloj, kaj por la ekologia sistemo ĝenerale ;

Emfazante ke la personoj plej tuŝataj de la klimatŝanĝo estos la plej malfriĉaj de la planedo, ke iliaj hejmoj kaj iliaj vivfontoj detruiĝos kaj ke ili devos elmigri kaj serĉi rifuĝejon ;

Konfirmante ke 75 % de la historiaj ellasoj de forcejaj gasoj aperis en la malracie industriigitaj Nordaj landoj ;

Konstatante ke la klimatŝanĝo estas la produkto de la kapitalisma sistemo ;

Bedaŭrante la fiaskon de la Kopenhaga Konferenco pro la tiel nomataj „evoluintaj” landoj kiuj ne volas agnoski la klimatan ŝuldon kiun ili havas al la evolulandoj, la estontaj generacioj kaj al la Patrino Tero ;

Asertante ke por garantii la plenan respekton de la Homrajtoj en la 21-a jarcento necesas agnoski kaj respekti la Rajtojn de la Patrino Tero ;

Reasertante la bezonon batali por la klimata justeco ;

Agnoskante la bezonon fari urĝajn agadojn por eviti pli gravajn damaĝojn kaj suferojn por la homaro kaj por la Terpatrino, kaj restarigi la harmonion kun la naturo ;

Konfidante ke la popoloj de la mondo, gvidataj de la principoj de solidareco, justeco kaj respekto por la vivo, kapablos savi la homaron kaj la Terpatrinon ;

Celebrante la internacian tagon de la Patrino Tero,

La Registaro de la Plurnacia Ŝtato Bolivio kunvokas la popolojn, la sociajn organizaĵojn kaj la defendantojn de la Patrino Tero de la tuta mondo, kaj invitas la scienculojn, la esploristojn, la juristojn kaj la registarojn kiuj volas labori kun siaj popoloj, al la Monda Konferenco de la Popoloj pri la Klimatŝanĝo kaj la Rajtoj de la Patrino Tero, kiu okazos de la 20-a ĝis la 22-a de aprilo en Koĉabambo, Bolivio.

La celoj de la Monda Konferenco de la Popoloj pri la Klimatŝanĝo kaj la Rajtoj de la Patrino Tero estas :

- 1. Analizi la strukturajn kaj sistemajn kaŭzojn kiuj estigas la klimatŝanĝon kaj proponi fundajn disponojn kiuj ebligas la bonfarton de la tuta homaro en harmonio kun la naturo.

- 2. Diskuti kaj interkonsenti pri la projekto de la Universala Deklaro de la Rajtoj de la Patrino Tero.

- 3. Interkonsenti proponojn pri la novaj engaĝiĝoj por la Protokolo de Kioto kaj por la projektoj de Decidoj de la Konvencio de la Unuiĝintaj Nacioj pri la Klimatŝanĝo kiuj gvidos la agadojn de la registaroj kiuj defendas la vivon dum la intertraktadoj pri la klimatŝanĝo kaj en ĉiuj instancoj de la Unuiĝintaj Nacioj, pri jenaj punktoj :

a) la klimata ŝuldo,

b) la rifuĝantaj migrantoj pro la klimatŝanĝo,

c) la reduktado de la gasellasoj,

ĉ) la adaptado,

d) la transigo de teĥnologio,

e) la financado,

f) la arbaroj kaj la klimatŝanĝo,

g) la komuna vizio,

ĝ) la indiĝenaj popoloj kaj

h) aliaj punktoj.

- 4. Labori pri la organizado de la Monda Referendumo de la Popoloj pri la Klimatŝanĝo.

- 5. Analizi kaj starigi Agadplanon por antaŭenigi la starigon de Tribunalo pri Klimata Justeco ;

- 6. Difini la strategiojn de agado kaj de mobilizado por la defendo de la vivo fronte al la klimatŝanĝo kaj por la Rajtoj de la Patrino Tero.

Bolivio, la 5-an de januaro 2010

Evo Morales Ayma

Prezidanto

de la Plurnacia Ŝtato Bolivio

Trad. Vilhelmo Lutermano, ĉe Monda Asembleo Socia (MAS)