Monda ASEMBLEO Socia (MAS)  [<<<]
Aŭskultado en la Kongreso de Usono
de Jean-Guy ALLARD  
18a novembro 2007

Posada Carriles : konfesa teroristo kaj kompliceco de la registaro

EKDE SEPTEMBRO 2005, la Departemento pri Sekureco de la Patrujo (DHS en la angla) de Usono definitive kaj intence ekskludis uzi la surbendigon de konfeso de Luís Posada Carriles, akirita en Karakaso en 1977 de la usona ĵurnalisto Blake Fleetwood, en ĉeesto de Orlando Bosch.

Tio estis rivelita en Vaŝingtono antaŭ la Subkomitato pri Internaciaj Organismoj, Homrajtoj kaj Superrigardo de la usona Kongreso, en aŭskultado kunvokita de la kongresano William Delahunt pri la internacia teroristo kaj CIA-agento.

Fleetwood, kiu konservas de tiu epoko surbendigitan kopion de la atesto, publikigita en la revuo New Times, jam estis akceptinta atesti, kiel tion petis de li la advokatino Jo Ellen Ardinger, taskita pri la kazo tiu periodo.

"En 1977 mi intervjuis du de la plej danĝeraj teroristoj de la 20-a jarcento", komencis Fleetwood, kiu rakontis, kiel li trovis aliron, kun surbendigilo en la mano, al Posada kaj Bosch, en la venezuela malliberejo, kie ili estis tenataj pro la atenco al la aviadilo de Cubana de Aviación okazinta jaron antaŭe.

La du teroristoj, surprizitaj pro lia ripeta aperado kaj frustritaj pro sia situacio, ili esprimis malkaŝe sian fieron pri siaj krimoj.

"Mi estis dungita de la CIA"

Laŭ Fleetwood, Posada rakontis laŭvorte : "Mi estis dungita de la CIA je 300 dolaroj semajne plus elspezoj. La CIA helpis min starigi mian detektiv-agentejon kie ni planis agojn".

Rakontas la ĵurnalisto, ke la du malliberuloj "parolis pri la murdo al du kubaj diplomatoj en Argentino, pri la atenco kontraŭ la ambasadejo de Meksikio en Bonaero, pri la atenco kontraŭ la oficejoj de Air Panamá en Bogoto, la oficejoj de Cubana de Aviación en Panamo kaj, fine, pri la atenco al la aviadilo de Cubana kiu rezultigis la morton de 73 civiluloj".

Posada kaj Bosch ankaŭ konfirmis, kiel "ĉio" estis planita en la kunveno de Bonao, Dominiko, kie stariĝis la CORU, kiu poste faris atencojn en la tuta kontinento.

Fleetwood klarigis ke, kiam li revenis al sia hotelo, la Anauco Hilton, li tuj kontaktis la prokuror-adjunkton Eugene Propper, kiu tiam esploris pri la murdo al Orlando Letelier en Vaŝingtono.

Propper realvokis lin minutojn poste : "La CIA informis la sekretan policon. Ili estas post vi. Vi estas en granda danĝero". La raportisto eksciis poste ke la venezuela prezidanto Carlos Andrés Pérez donis perone la ordonon al la DISIP kapti lin.

"En septembro 2006 mi proponis la informon, miajn notojn kaj surbendigaĵojn al la DHS. Mi estis kontaktita de Jo Ellen Ardinger, prokurorino de la Departemento pri Sekureco de la Patrujo. Ŝi ŝajnis ekscitita de mia informo kaj kontaktis min telefone kaj retpoŝte", memoris Fleetwood.

Ardinger diris al li ke tiu informo estas "precize" tio kio necesas por malhelpi ke Posada restu en usona teritorio, ĉar ĝi klare montras ke li estas teroristo.

"Ŝi demandis min ĉu mi deziras atesti. Mi diris al ŝi ke jes."

Monatojn poste li eksciis pri la migrad-proceso de El Paso antaŭ la juĝistino Kathleen Cardone. "Mi atendis ke la DHS kontaktu min pro miaj notoj kaj surbendigaĵoj... Neniam ĝi faris tion."

La ĉefo diris : "Aŭdu, minuton"

La konata ĵurnalistino Ann Louise Bardach, aŭtoro de la intervjuo kun la teroristo por The New York Times en 1998, malkaŝis kiel agentoj de la FBI, kiuj esploris en Gŭatemalo informojn pri la du atencoj de Havano, asertis al li konfidence ke ilia laboro estis bruske interrompita post kiam ili intervjuis Antonio-n Álvarez, kuba-usona negocisto de Greenville, Sud-Karolino, ĉefo de WRB Enterprises, firmao de Tampo kun filioj en Centrameriko.

Álvarez estis observinta du el siaj kunlaborantoj, kompanoj de Luis Posada, kiel ili manipulis eksplodaĵojn kaj estis avertinta la aŭtoritatojn.

"Ni trovis tion absolute kredinda", diris FBI-agento citita de Bardach. "Ni pensas ke estus facila afero : ni akuzos kaj arestos Posada-n. Sed tiam, iun tagon ni havis kunvenon kaj la ĉefo diris : Aŭdu, minuton, estas homoj ĉi tie kiuj diras ke li estas batalanto por la libereco. Tio ŝokis nin. Ili komplete fermis la esploradon pri Posada. Kiam ni petis la permeson fari telefonajn subaŭskultadojn de Orlando Bosch, ili rifuzis tion".

Poste, Bardach ankaŭ surprizis la Kongresan aŭskultantaron kiam ŝi malkaŝis ke Posada Carriles neniam vere bezonis buŝtradukiston por komuniki en la angla, memorigante ke la preteksto de malbona buŝtradukado pravigis lian liberigon.

Posada lernis la anglan junule, ŝi emfazis. "Li agis kiel tradukisto dum la Iran-Contra por la usonaj militistoj. Mi intervjuis lin precipe en la angla kiel faris Blake Fleetwood por New Times en 1976 kaj li montris neniam ajnan malfacilon por kompreni nin", diris Bardach.

"Fakte, lia advokato, Matthew Archambleault, taskita pri lia kulpigo, parolis al li en la angla."

La raportistino memoris kiel la FBI de Miamo, en aŭgusto 2003, ĉesigis ĉian esploradon pri Posada, kiam li estis malliberigita pro terorismo en Panamo.

"La ĉesigo de tiu kazo permesis la detruadon de la pruvoj kontraŭ li, kiujn FBI-agentoj estis zorge kolektintaj dum tiom da jaroj, deklaris ŝi, kaj poste klarigis ke Judy Orihuela, la proparolantino de la FBI de Miamo informis ŝin ke la operacio fariĝis kiel parto de "rutina purigado" de la pruvo-ĉambro nomata The Bulky.

Orihuela konfirmis ke tia operacio devis esti subskribita de la speciala agento kiu laboris kiel ĉefo de la oficejo de Miamo, Héctor Pesquera, kiu siavice bezonis verdan lumon de la oficejo de la federacia prokuroro Marcos Jiménez.

FBI-fontoj rivelis poste al Bardach ke la detruitaj dokumentoj plenigis "kvin kestojn".

La ĵurnalistino indikis ke tiu situacio okazis dum la kongresanoj Ileana Lehtinen kaj Lincoln Díaz-Balart petis la liberigon de la teroristo, skribante dufoje leterojn al la panama prezidantino Mireya Moscoso.

Inter la atestantoj kiuj aperis en la aŭskultado en la Kapitolo troviĝis la universitatano Peter Kornbluh, ĉefa analizisto de la Arĥivo de la Nacia Sekureco de la Universitato George Washington.

La esploristo invitis la kongresanon Delahunt konsulti la pli ol 700 sekretajn dokumentojn de la FBI kaj de la CIA kiuj prezentiĝis al la tribunalo en la migrado-kazo de Orlando Bosch kaj kiuj, se ili ne estas en tiu momento detruitaj, dokumentas ankaŭ la teroristecon de Posada.

Kun la senpunigo de Bosch la 17-an de julio 1990, ordonita de la patro de la nuna usona prezidanto, kaj la nuna situacio de Posada, Usono "troviĝas hodiaŭ en pozicio simple neklarigebla, ĉar ĝi havas ne unu, sed du homojn kiujn niaj inform-agentejoj identigas kiel respondeculoj de la faligo de civila aviadilo kaj kiuj vivas libere en Florido", komentis Kornbluh.

"Meze de milito kontraŭ la terorismo, tio havas signifajn sekvojn por Usono", asertis li.

Roseanne Nenninger, fratino de juna guajanano kiu pereis en la sabotaĵo de la aviadilo de Cubana en 1976, donis emocian ateston, interrompitan de larmoj, pri la tragedio kiun suferis ŝia familio pro la kulpo de la teroristo kaj CIA-agento.

La reprezentanto Delahunt, finante la aŭskultadon, certigis ke li konsideras "prioritato" la esploradon kaj anoncis ke li petos havigi la atestojn de Freddy Lugo kaj Hernán Ricardo, la komplicoj de Posada kaj Bosch en la kromo de Barbado.

La registaro de Venezŭelo petas la ekstradicion de Posada Carriles de pli ol du jaroj, dum la Blanka Domo obligas la obstaklojn, por savi la torturiston, murdiston kaj teroriston ligitan kun la miama mafio kaj kun la Bush-klano de jardekoj.

Jean-Guy ALLARD.

Fonto : Granma, 17-a de novembro 2007

Elhispanigita de Monda Asembleo Socia (MAS) -vl